للرخامه اصول

[drbaka_2004]

للرخامه , اصول

لو عاوز تكون رخم عليك بإتباع الأتي

فى الكلية هتقابل صاحبك وهتقعدوا على أى رستوران بقى

هيجى الجارسون سيب صحبك يطلب الأول وبعدين استلم الجارسون بقى

واديله نصيبه
قوله عندك برجر ؟ هيقولك اه
قوله حلو ؟ هيقولك تمام
قوله اوك يبقى اكتب واحد شاورمة

طب عندك كبده ؟ هيقولك ايوة قوله معمولة ازاى ؟

سيبه يرغى شوية وقوله انا اصلا مبحبش الكبدة فكك
حاول تطلب حاجات غريبة زى سندوتشات حلاوة طحينية على اساس انك فى سجن أبو زعبل

أو سندوتشات بيض أو بتنجان أو لبن العصفور أمسك فى الحاجات اللى مش موجودة كلها

المهم حاول تجيبله جفاف لحد ما تطلب اللى انت عايزه

وأنت بتاكل بقى أتسلى على المخلل اللى مش عاجبك أرمى شوية على التربيزة وشوية على الأرض أنت وذوقك بقى

لو معاك كاتشب مفيش مانع تكتب أول حرف من اسمك على التربيزة ترسم قلب عادى يعنى المهم تخليله التربيزة شبه التورتة

ومتنساش تعيب على الأكل وأنت بتحاسب وكمان تقول الحساب غالى

فى المدرج أرشق نفسك بين أتنين متعرفهمش وابتدى الشغل بقى أتعامل على إنك صاحبهم من يجي 100 سنه

يضحكوا على حاجة اضحك معاهم كده يعنى المهم تركز معاهم كأنك من بقيت أهلهم ولا خلفوك ونسوك

أو طريقة تانية أتلكك لكل اللى جنبك كل ماحد ينطق كلمة قوله لو سمحت أسكت عشان أفهم

لو مسكتش أنا هقول للدكتور والحركة دى رذلة ومستفزة جدا بس اشطه يعنى

و يا سلام لو واحد و واحدة يبقى أنت كده جبت من الآخر

لو جنبك واحد بيكتب يبقى اتفتحتلك طاقة القدر اقعد اسأله وعطله ومتخليهوش يكتب سطرين على بعض

استلم أى حد واسأله المحاضرة هتخلص امتى ؟ وكل فيمتو ثانية كده اسأله الساعة كام اصل أنا زهقت

طبعا هو اللى زهق وطهق من الكلية وبيقول ياريتنى ماكملت تعليم وكره حياته كلها زى باقى الضحايا

عايز تعمل دماغ حلوة روح على شباك شئون الطلبة المهم حاول تعمل أهبل وأنت داخل وعايز تقف أول واحد

هيرجعوك ورا تحاول تقف مكان أى حد وترذل على كله هما أصلا بيبقوا واقفين مش طايقين نفسهم

لو واقف تانى واحد كده مفيش مانع تزق اللى قدامك تلبسه فى الشباك الحديد وتقول الله ياجماعة ياللى ورا متزقوش

ومن قبل ماينطق ولا كلمة تقعد تقوله خلص يا عم عشان غيرك ومتخليهوش يركز مع بتاع شئون الطلبة خالص

لما يجى دورك بقى بيبقوا عايزين يخلصوك ويكروتوك واللى واقفين وراك فى الطابور مستنينك تغور فى داهية بفارغ الصبر

خد وقتك كأنك بتحجز فى سينما و اسأل أسئلة كتير وكل مايقولك حاجة قوله مش فاهم معلش قول تانى فهمنى أعمل أيه بالظبط لحد ماتشل أكبر عدد ممكن

وانت فى اى مكان تانى

- قوووول نكتة جاااااامدة طحن و طويلة..و ف النهاية-ف الحتة بتاع الافية-قول انا نسيتها..و لو عايز قمة الرخامة..قول كنت عارفها بس نسيتها و كانت جااامدة اوي..
-..
- هات بخاخة مطهر"ديتول"و امشي ورا صاحبك..كل ما يمسك حاجة..قوم ترشها بالبخاخة علي طوووول

- طول مانتا قاعد قلد صوت الفاكس!! تكتكتك تكتتكتك كده يعني

- لو انتا ف مكروباص و اللي جنبك غفل و نام..قلد صوت كلكس العربية..و قول :تييييييييييت..

- لو رخم اوي و مصحيش..صحية..و لو نام تاني صحية تاني..خليك وراة يا نجم!!

- و انت بتتكلم ف موضوع اسكت او اقطع كلامك -بس اعمل انطباع انك هتكمل-و ما.......بس خلاص

- لما حد يشتكيلك من حاجةاسمع منة كويس اوي اوي.. و بعد كدا قولة:انا عندي مشاكل اكتر منك يا جدع..فكك مني

- ف المطعم بص لواحد و انتا ف ايدك اللقمة بصلة وقت طويل اوي..و قولة لما تحس انة بدأ يستغرب "ممكن الطحينة ثواني!!"

- لو انتا قاعد مع اصحابك بتتفرجوا ع التلفزيون و فصل الارسال
و عمل التلفزيون صوت:وش ش ش ش ش ..علي الصوت اوي

- لو مفصلش..غير القناه قبل نهاية المتش او المسلسل ب 5 دقايق- او ف حتة جااامدة-

- و انتا قاعد مع اصحابك صفر نشيد بلادي بلادي

- كرر الحركة بعد 10 دقايق

- كل ما حد يقول حاجة قولة:هاها..كل الناس فاكرة زيك كدا!!

- استلف قلم من صاحبك..وحط طرفة ف بقك...و اعمل نفسك بتفكر اوي ف حاجة و مندمج- وانتا قاعد تعضعض ف القلم!!

- اضحك لواحدة ف الشارع بصوت عالي و قولها:طب و انتي عاملة اية؟

- لو كنت بتتفرج مع اصحابك علي فيلم ف اوله..احرقة ف جملة واحدة!!

- و هما بيتفرجوا و تيجي حتة معينة..قلهم:انا مش قلتلكم!!

- ف المترو امضغ اللبانة بصوت عالي و ادوش اللي جانبك

- لو كان بيقرا جرنال اقرا معاه..و علي صوت اللبانة يا نجم

- لو واقف واحد متعرفوش جنبك بيعد فلوس..ف نص الفلوس قولة رقم عشوائي

ملحوظه ....
لو حد ضربك انا مش مسؤل

المصدر: ..:: MoZaWLa ::.. - من قسم: الضحك والفرفشة

---

ggvohli hw,g

[bedo230]

دنتا لو عملت هنا كده الهيئه هتاكلك ضرب
هاتموت يانجم

[fatomaa]

يلهوى ع الرخامه رخم رخم فعلا ههههههههههه

مش انت

[drbaka_2004]

برده كفر شكر على المرور يا بيدو
بس انت عارف اخوك ماشي بصدره هنا ومحدش واخد معاه حق ولا باطل
صبح صبح يا عم الجح

[drbaka_2004]

مشكوره على المرور يا طماطم
و يا رب يكون الموضوع عاجبكم

[الداده دودوى]

تسلم ايديك ههههههههههه بس لو حدعمل كده ميه فى الميه هيروح المستشفى ههههههههههههههههههههه

[drbaka_2004]

منورا التوبيك يا ست الكل واللهي
مشكوره يا دودي

[orange 99]

بصراحة رخامة مفيش بعد كده
ههههههههههههه
أفكارك جهنمية ........... بس دمها خفيف
شكرا ع التوبيك
تسلم إيدك يا دربكة

[drbaka_2004]

الف شكر يا orange 99 على المرور
و ارجو ان اكون عند حسن ظنكم دائما

[drbaka_2004]

......................................